د ابن سینا د څېړنې او پراختیا مؤسسې تخنیکي ټیم د عامې روغتیا وزارت له لوړپوړو مسؤولینو سره وکتل
د ابن سینا د څېړنې او پراختیا مؤسسې (ISRDO) تخنیکي ټیم د عامې روغتیا وزارت له لوړپوړو مسؤولینو سره د برېښنايي صحي کارت د تطبیق په اړه مفصلې خبرې وکړې.
دا ناسته، چې د ۱۴۰۳ د سلواغې په ۲۱مه (۹ فبروري ۲۰۲۵) ترسره شوه، د پخوا ناستو دوام و، چې هدف یې د دې ملي پروژې پر تخنیکي، اداري او اجرایي برخو تمرکز کول دي.
په دې ناسته کې، د ابن سینا د څېړنې او پراختیا مؤسسې له لوري محترم اسدالله اوریاخېل، محترم دلاور درمل، محترم اجمل مومند، او محترم سیف الرحمن اسحق زی ګډون کړی و. له بلې خوا، د عامې روغتیا وزارت له لوري محترم دوکتور عنایت الله عنایت، د نظارت او ارزونې کمېټې رئیس، محترم دوکتور احسان الله، د عمومي ریاست سلاکار، محترم دوکتور رسول ګل ثمر، او د وزارت نور مسؤولین حاضر وو.
د ناستې پیل د محترم دوکتور عنایت الله عنایت له خوا د قرآن کریم د څو آیتونو په تلاوت وشو، او د ابن سینا مؤسسې د ټیم غړو ته یې د ښه راغلاست ترڅنګ د دوی هڅې وستایلې.
وروسته، محترم دوکتور دلاور درمل د برېښنايي صحي کارت پریزنټیشن وړاندې کړ، چې د ابن سینا مؤسسې د متخصصینو له خوا چمتو شوی و. نوموړي د دې پروژې پر مهمو تخنیکي او اداري اړخونو، د هغې پر ګټو، او د عملي کولو پر وړاندې شته ستونزو تفصیلي معلومات ورکړل.
د عامې روغتیا وزارت مسؤولینو د معلوماتو له اورېدو وروسته، د لا زیاتو وضاحتونو غوښتنه وکړه، چې پکې لاندې موارد شامل وو:
•د ابن سینا مؤسسې د داخلي او بهرنیو متخصصینو معرفي،
•د برېښنايي صحي کارت مقایسوي څېړنه له هغو سیستمونو سره، چې اوس مهال د عامې روغتیا وزارت کې فعال دي،
•د تخنیکي ټیم د غړو تفصیلي معلومات، ترڅو د پروژې اړوند تخنیکي پوښتنو ته ځوابونه ورکړل شي.
دواړو خواوو توافق وکړ، چې د دغو موضوعاتو د لا روښانتیا لپاره به راتلونکي اقدامات مشخص کړي، څو د برېښنايي صحي کارت پروژه په مؤثره توګه عملي شي.
د ابن سینا د څېړنې او پراختیا مؤسسه
کابل